兒童束縛設備指南

各位爸爸媽媽注意啦！為加強保障兒童乘車安全，由11月1日起，8歲以下或者身高未達1.35米嘅小朋友乘坐私家車時必須使用符合規格嘅兒童束縛設備；8歲或以上兒童或者身高至少1.35米嘅小朋友，則必須使用兒童束縛設備或佩戴成人安全帶，否則司機唔可以揸車上路。等小編話你知選購兒童束縛設備嘅五大重點：

• 按小朋友身高體重揀設備型號最穩陣，年齡只係參考。
• 購買前記得充份了解安裝同埋使用方法，確保使用恰當。
• 認明設備上永久標記嘅國際認證標準，有認證嘅先可靠。
• 首次使用前，應該先清洗安全座椅嘅椅套、安全帶同埋軟墊等。
• 購買二手設備難以保證產品有冇曾受撞擊。撞擊之後，機械結構可能已經被破壞而表面係睇唔出嘅。至於親友用過嘅，都要問清楚有冇曾受撞擊。

除左傳統嘅兒童安全座椅，市面上亦有安全帶調節器、穿戴式安全約束背心、可折疊幼兒增高座位等各種便攜式兒童束縛設備可供選擇。呢啲設備都可以有效保護小朋友，大幅減低死亡或者重傷風險。雖然保護能力比兒童安全座椅弱，但都好過完全冇用任何安全裝置。呢啲裝置嘅設計輕巧便攜，適合偶爾先會坐私家車嘅小朋友。

違例司機將被罰款230港元，案情嚴重者可被罰款最高2,000港元架。